Athro / Athrawes Cymraeg - Ysgol Morgan Llwyd

Cyflog: £33,731 - £51,942

Ynglŷn â'r Rôl
Athro / Athrawes Cymraeg - Cyfnod mamolaeth

Llawn amser

MPR/UPR

Mae'r adran Gymraeg yn un o adrannau pwysicaf yr ysgol fel ysgol cyfrwng Cymraeg. Mae hefyd yn adran llwyddiannus iawn. Addysgir y pwnc i bob disgybl yng Nghyfnod Allweddol 3 a 4 a bydd pob disgybl yn gadael yr ysgol gyda chymhwyster TGAU yn y pwnc. Mae niferoedd iach yn dewis y pwnc yn y chweched ac mae canlyniadau'r adran yn gyson dda.

Dyma un o adrannau mwyaf yr ysgol. Mae 7 athro/wes arbenigol yn dysgu'r pwnc a 2 athro/wes arall yn cyfrannu tuag at ddysgu CA3 o dan arweiniad ardderchog pennaeth yr Adran, Mrs Eurgain Hughes. Mae 6 ystafell ddysgu braf yn yr Adran ynghyd a swyddfa a stordai ar gyfer yr Adran. Mae adnoddau TGCH penodol i'r adran yn ogystal a mynediad i adnoddau ysgol gyfan.

Prif ddyletswydd Athro / Athrawes Cymraeg yw addysgu Cymraeg i flynyddoedd 7 i 11. Bydd yr athro/wes yn atebol i bennaeth yr adran. Bydd athro/wes newydd gymhwyso o dan ofal Mentor Sefydlu.

Penodir yn unol ag amodau cyflogaeth cyfredol athrawon ysgol sydd wed-i'u cynnwys yn Nogfen Tâl ac Amodau Athrawon Ysgol, a'r safonau proff-esiynol newydd ar gyfer athrawon (Cymru).

Am rhagor o wybodaeth gwiriwch y pecyn swydd.

Mae angen gwiriad manwl gan y Gwasanaeth Datgelu a Gwahardd a chofrestriad Cyngor y Gweithlu Addysg ar gyfer y swydd hon.

Mae'r Cyngor yn croesawu ceisiadau gan ymgeiswyr â chymwysterau addas heb ystyried hil, rhyw, anabledd, rhywioldeb, cred grefyddol nac oed.
Amdanom Ni
Ysgol uwchradd gyfrwng Cymraeg yw Ysgol Morgan Llwyd wedi'i lleoli yn ninas Wrecsam ac sy'n gwasanaethu dalgylch eang Sir Wrecsam. Fe'i hagorwyd yn 1964 gyda chriw bach o ddisgyblion, ac ers hynny, mae'r ysgol wedi mynd o nerth i nerth gan symud i safle newydd yn y flwyddyn 2000. Erbyn hyn mae bron i 900 o ddisgyblion ar ein cofrestr a 81 yn y chweched dosbarth. Daw ein disgyblion o'r ddinas ei hun, y pentrefi cyfagos ac o ardal wledig Dyffryn Ceiriog. Ysgol Morgan Llwyd yw unig ysgol uwchradd Gymraeg y Sir ac un o'r ddwy ysgol yn unig sydd â Chweched Dosbarth.

Ymfalchïwn yn ein traddodiad o lwyddiant academaidd ein disgyblion a'u llwyddiannau ymhob rhan o fywyd allgyrsiol yr ysgol.

Ein gweledigaeth yw sicrhau fod Ysgol Morgan Llwyd yn ysgol ofalgar sydd yn datblygu dysgwyr uchelgeisiol a galluog, mewn awyrgylch ble mae pawb yn hapus, yn ddiogel ac yn awyddus i ddysgu .