Swyddog Bugeiliol A Chynhwysiad

Cyflog: Gweler Hysbyseb Swydd

Manylion
Hysbyseb Swydd

ADDYSG

YSGOLION UWCHRADD

Ysgol Glan y Môr, Pwllheli

(Ysgol Gyfun 11 - 16: 507 o ddisgyblion)

Yn eisiau: Medi 1af, 2025

SWYDDOG BUGEILIOL A CHYNHWYSIAD (PARHAOL)

Cytundeb parhaol.

Oriau gwaith: 33 awr yr wythnos.

40 wythnos waith mewn blwyddyn ysgol sef 38 wythnos tymor ysgol, 5 diwrnod mewn hyfforddiant yn ogystal â bod ar gael i weithio wythnos yn ychwanegol tu hwnt i'r oriau arferol).

Mae Llywodraethwyr yr ysgol yn awyddus i berson brwdfrydig ac egnïol ar gyfer y swydd uchod sydd yn meddu ar y cymwysterau priodol a'r sgiliau addas.

Graddfa Gyflog: Telir cyflog yn unol ag Amodau Gwaith ar gyfer Gweithwyr Llywodraeth Leol, Graddfa S1 pwyntiau 12 - 17 (sef £22,018 - £23,885) y flwyddyn, yn ôl profiad a chymhwyster.

Mae'r gallu i gyfathrebu'n effeithiol trwy gyfrwng y Gymraeg a'r Saesneg yn hanfodol ar gyfer y swydd yma. Mae'r ysgol yn gweithredu'n unol a'i Bolisi Iaith. Bydd angen i'r ymgeisydd gyrraedd y lefel ieithyddol sy'n cael ei nodi yn y Manylion Person.

Gwahoddir unrhyw un sydd â diddordeb a/neu angen mwy o wybodaeth i drafod yn anffurfiol â'r Pennaeth Mr Guto Wyn.

Gellir cyflwyno cais am y swydd yma ar-lein ar wefan Cyngor Gwynedd neu mae pecyn cais i'w cael gan Mr Robin Llywelyn Roberts, Rheolwr Busnes, Ysgol Glan Y Mor, Ffordd Caerdydd, Pwllheli, Gwynedd, LL53 5NU (Rhif ffôn: 01758 701244) ; e-bost: sg@glanymor.ysgoliongwynedd.cymru. Os dymunir dychwelyd y cais drwy'r post, dylid ei ddychwelyd i'r cyfeiriad uchod erbyn y dyddiad cau.

DYDDIAD CAU: HANNER DYDD, DYDD LLUN 30 O FEHEFIN, 2025

Bydd y Cyngor yn gofyn am ddadleniad gan y Gwasanaeth Datgelu a Gwahardd a chadarnhad o gofrestriad gyda'r Cyngor Gweithlu Addysg ar gyfer yr ymgeisydd llwyddiannus cyn y gallent gychwyn yn y swydd yma.

Mae'r awdurdod hwn wedi ymrwymo i ddiogelu a hyrwyddo lles plant a phobl ifanc ac mae'n disgwyl y bydd pob un o'i staff a'i wirfoddolwyr yn rhannu'r ymrwymiad hwn.

Manylion Person

-

Swydd Ddisgrifiad

Swydd ddisgrifiad: Swyddog Bugeiliol a Chynhwysiad

Rheolwr llinell:

Pennaeth drwy aelodau o'r Uwch Dim Arwain / Penaethiaid Blwyddyn

Oriau gweithio:

33 awr yr wythnos dros gyfanswm o 195 diwrnod y flwyddyn.

Graddfa gyflog:

Pwyntiau S1

Pwrpas y swydd:

Prif bwrpas y swydd ydy cefnogi, arfogi ac annog disgyblion i ymroi i waith a bywyd bob dydd yn yr ysgol gan hyrwyddo a datblygu dysgwyr uchelgeisiol, iach a hyderus. Bydd yn golygu gweithio'n rhagweithiol gyda'r disgyblion ac hefyd yn ymateb i sefyllfaoedd a phroblemau dydd i ddydd gan roi cefnogaeth i ddisgyblion ymdopi a datrys unrhyw broblemau neu sefyllfaoedd.

Bydd hyn yn golygu meithrin perthynas bositif gyda disgyblion a'u rhieni, ac annog a chefnogi y disgyblion i ymroi i waith a bywyd yr ysgol. Mae'r Swyddog Bugeiliol a Chynhwysiad yn ategu gwaith athrawon ac asiantaethau eraill.

PRIF GYFRIFOLDEBAU

Gweithio'n rhagweithiol gyda charfan o ddisgyblion er mwyn eu cefnogi, arfogi a'u hannog i datblygu dysgwyr uchelgeisiol, iach a hyderus ac i gydweithredu gyda gweithdrefnau hyrwyddo ymddygiad da yr ysgol.

Monitro ymddygiad ac ymroddiad disgyblion mewn gwersi ac o amgylch y safle yn barhaus, ac ymateb yn ôl yr angen.

Cefnogi gwaith y Swyddog Presenoldeb a Lles a chydweithio gyda'r tîm Lles i wella presenoldeb a chadw strategaeth presenoldeb yr ysgol yn gyfredol.

Gweithredu fel un o'r prif bwyntiau cyswllt ar gyfer rhieni pan maent yn adrodd ar faterion bugeiliol a lles.

Monitro prydlondeb disgyblion i'r ysgol ac i wersi a bod yn bresenoldeb ar y coridorau ar ddechrau a diwedd y dydd, rhwng gwersi a dros amser egwyl a chinio'r disgyblion.

Cefnogi a dirprwyo ar ran y Penaethiaid Blwyddyn neu aelodau o'r Uwch Dîm i ddelio gyda sefyllfaoedd a allai fod yn anodd a chymhleth. Ymchwilio i broblemau a sefyllfaoedd a chydweithio a chanfod datrysiad drwy weithio gyda'r Penaethiaid Blwyddyn / Uwch Dîm

Cefnogi rôl rhieni yn addysg eu plant a datblygu cyswllt rheolaidd gyda rhieni carfan o ddisgyblion er mwyn dylanwadu ar eu profiad yn yr ysgol. Cydweithio gyda'm i drefnu a chynnal cyfarfodydd gyda rhieni er mwyn gwella profiad y disgyblion yn yr ysgol a sicrhau cydweithrediad gyda'r gweithdrefnau hyrwyddo ymddygiad da.

Annog y disgyblion i gyd-dynnu a gweithio gydag eraill, ac ennyn diddordeb mewn Hybu annibyniaeth a defnyddio strategaethau sy'n cydnabod ac yn gwobrwyo disgyblion sy'n dangos eu bod nhw'n hunan ddibynnol.

Cyfrannu at y drefn o fod aelod o staff 'ar alw' ar yr adegau prin pan gyfyd problem mewn gwers. Delio ar y cyd gyda'm gan gydweithio'n agos gyda'r Penaethiaid Blwyddyn.

Cefnogi gwaith Pencampwr PYD yr ysgol, drwy roi cefnogaeth i ddisgyblion sy'n gymwys i PYD a disgyblion bregus gyda eu lles a'u cynnydd addysgol.

Staffio ar amserlen a fel bo'r angen y darpariaethau cefnogol i ddisgyblion o ran lles, ymddygiad a dysgu, gan reoli mynediad disgyblion i'r adnoddau a darpariaethau a chefnogi gwaith staff eraill o fewn y darpariaethau. Derbyn galwadau ffôn am les, presenoldeb a chynnydd disgyblion ac ymchwilio / gweithredu yn ôl yr angen.

Cynnal disgyblion i gwblhau cyrsiau amgen a gweithio tuag at gymwysterau o fewn y cwricwlwm amgen.

Gweithio gyda'r asiantaethau perthnasol a mynychu cyfarfodydd yn unol â'r galw.

Mentora grwpiau penodol o ddisgyblion o ran eu lles, cyrhaeddiad ac ymddygiad.

Cydweithio hefo asiantaethau i gydlynu gweithgareddau cyfoethogi ym maes llesiant i ddisgyblion CA3 a CA4.

Darparu gwasanaeth diduedd i ddisgyblion, ac eirioli ar eu rhan yn ôl y gofyn.

Cynorthwyo'r Penaethiaid Blwyddyn drwy ymateb yn ôl yr angen i geisiadau gan rieni ac asiantaethau allanol am wybodaeth am gyflawniad, cynnydd ac ymddygiad disgyblion.

Meithrin perthynas â'r dysgwyr a datblygu eu sgiliau a'u galluoedd drwy gyfrwng y cyfleodd a ddarperir .

Gweinyddu a goruchwylio profion arholiadau, ble mae hynny 'n briodol.

Mynychu cyfarfodydd y tîm lles a chyfarfodydd staff boreol.

Cyflenwi gwersi mewn adegau prin o argyfwng.

Gwaith gweinyddol perthnasol yn ôl gofyn y Pennaeth / Uwch Dîm.

• Ceisio ar lein - Sut?
  
• Rhestr Swyddi