BETH YW DARLITHYDD ADDYSG BELLACH?
Rydym yn helpu grŵp amrywiol o ddysgwyr i ddarganfod sgiliau, angerddau a thalentau newydd fel y gallant ennill y cymwysterau sydd eu hangen arnynt i gyflawni eu huchelgeisiau yn y dyfodol.
Rydym yn cyflwyno darlithoedd, tiwtorialau ac arddangosiadau mewn amrywiaeth o leoliadau megis colegau, canolfannau cymunedol, a sefydliadau cyflogwyr, gyda’r nod cyffredin o ysbrydoli dysgwyr i gredu ynddynt eu hunain a’u gallu i lwyddo.
Mae lefel y cymorth a’r arweiniad a ddarparwn yn cael ei phennu bob amser gan anghenion unigol dysgwyr a’u hamcanion gyrfaol. Rydym yn monitro cynnydd ac yn rhoi adborth ar brofion a gwaith cwrs. Yn aml, rydym yn gweithredu fel modelau rôl a mentoriaid – ac rydym bob amser yno i helpu dysgwyr i wneud y penderfyniadau sy’n addas iddyn nhw.
Mae ein cariad at ein pwnc yn golygu ein bod wedi ymrwymo i gynnal a diweddaru ein gwybodaeth bynciol, yn ogystal â’r ffordd orau i addysgu ac asesu. Rydym yn ddysgwyr gydol oes ac yn defnyddio tystiolaeth ac ymchwil i wella ein harfer yn barhaus.
Rydym yn angerddol ac yn ymroddedig i’r hyn a wnawn, gan ymdrechu i helpu dysgwyr i gyflawni eu potensial, a mwynhau eu hastudiaethau, a chyflawni’r canlyniadau gorau posibl.
Y CYMWYSTERAU BYDD EU HANGEN ARNOCH
Er mwyn cymhwyso fel darlithydd addysg bellach, fel arfer mae angen meddu ar gymhwyster Lefel 3 o leiaf yn y maes pwnc dewisol. Mae llawer o ddarlithwyr AB hefyd wedi ennill graddau, graddau sylfaen, neu gymwysterau proffesiynol. Er nad yw’n orfodol ar gyfer cael eu penodi i’r rôl, mae’n ofynnol i ddarlithwyr AB ennill TAR mewn addysg a hyfforddiant ôl-orfodol (AHO), sef rhaglen addysg athrawon broffesiynol sy’n darparu cymhwyster yn y sector addysg a hyfforddiant ôl-orfodol o fewn dwy flynedd (amser llawn) neu bedair blynedd (rhan-amser).
CYFLEOEDD AR GYFER DATBLYGIAD
Gall y rhain gynnwys:
- Uwch ddarlithydd / darlithydd arbenigol
- Pennaeth adran
- Cydlynydd rhaglenni
- Rolau rheoli