BETH YW PRIFATHRO?

Fel prifathrawon, ein gwaith ni yw arwain a rheoli staff a dysgwyr yn effeithiol gyda hyder rhieni, gofalwyr a'r gymuned ehangach. Gall ein swydd drawsnewid bywydau trwy ddarparu cyfleoedd dysgu sy'n galluogi dysgwyr i ddod yn gyfranwyr effeithiol i'r gymdeithas ehangach.

Rydym yn arwain gyda thrugaredd, hyder a gwytnwch, gan ysgogi ac annog ein staff i wneud yr un peth. Ein cyfrifoldebau yw goruchwylio’r ysgol o ddydd-i-ddydd.

Rydym yn aml yn rhannu'r dyletswyddau hyn â phenaethiaid cynorthwyol neu ddirprwy benaethiaid er mwyn cyflawni'r canlyniadau dysgu gorau posib ar gyfer pawb.

I sicrhau hyn, rydym yn monitro perfformiad dysgwyr a'r ysgol i adnabod meysydd y mae angen eu gwella, ac yn rhannu'r canlyniadau gyda llywodraethwyr, yr awdurdod lleol, consortia, Estyn, ymwelwyr, rhieni a gofalwyr.

Rydym hefyd yn cymryd cyfrifoldeb am gyllid yr ysgol, gan ddefnyddio adnoddau’n effeithiol i sicrhau bod yr adeiladau a’r tiroedd yn cael eu cynnal i safon uchel a’u cynllunio i ddiwallu anghenion dysgwyr.

Yn fwy na dim, rydym wedi ymrwymo i adeiladu tîm ymroddedig ac ysbrydoledig i'n helpu i gyflawni gweledigaeth ein hysgolion.